Бухгалтерлер апталығы аясында жұмыс берушілер мен мамандардың қатысуымен дөңгелек үстел өтті

Бухгалтерлер апталығы аясында Esil University «Есеп және аудит» кафедрасында «Есеп және аудит» білім беру бағдарламасының бакалавриат және магистратура студенттеріне арналған жұмыс берушілер мен тәжірибелі мамандардың қатысуымен дөңгелек үстел өтті. Іс-шара университет пен жұмыс берушілер арасындағы ынтымақтастықты нығайтуға және білім алушылардың кәсіби құзыреттерін дамытуға бағытталды.

«Салық есебі және оның ережелері» тақырыбында «Штадлер Қазақстан» ЖШС өкілі, магистрант Тулегенова С. Н. баяндама жасады. Спикер салық есебінің негізгі қағидаттарын, кірістер мен шығыстарды тану тәртібін, есептілікке қойылатын талаптарды және есеп жүргізу тәжірибесінде жиі кездесетін қателіктерді қарастырды. Баяндаманы ұйымдастыруға жауапты экономика ғылымдарының магистрі, аға оқытушы Оралбекова Ж. К. болды.

Artfood ЖШС өкілі Байканова А. Н. бюджеттеу, шығындарды бақылау, өнімнің өзіндік құнын қалыптастыру және басқарушылық шешімдер қабылдау мәселелеріне арналған «Басқарушылық есептің мәселелері» тақырыбында ғылыми семинар өткізді. Сонымен қатар Қазақстан Республикасы Ұлттық Банкінің Бухгалтерлік есеп әдіснамасы басқармасының бас маман-экономисі Прекеева А. А. «Қазіргі банктегі кассалық және валюталық операциялар: есепке алу және бақылау тәжірибесі» тақырыбында қонақ дәріс оқып, банктік есептің, валюталық операциялардың және ішкі бақылаудың ерекшеліктерін түсіндірді. Іс-шараларды ұйымдастыруға кафедра оқытушылары Бекжанова Т. К., Оралбекова Ж. К., Кажмухаметова А. А. және Айтхожина Л. Ж. қатысты.

Кездесулер барысында студенттер мен магистранттар шақырылған мамандармен бухгалтерлік, салықтық және басқарушылық есептің өзекті мәселелерін талқылап, практикалық ұсыныстар алды және жұмыс берушілердің кәсіби талаптарымен танысты. Іс-шара теориялық білім мен тәжірибе арасындағы байланысты нығайтуға және Esil University білім алушыларының кәсіби мүмкіндіктерін кеңейтуге ықпал етті.