Esil University студенттері «Менің шекарам – менің аумағым» тренингіне қатысты

Esil University қазақ бөлімінің 3-курс 2-топ студенттері жеке шекараны белгілеу және қорғау дағдыларын қалыптастыруға бағытталған «Менің шекарам – менің аумағым» атты тренингке қатысты.

Жоба «Қазақстандық жыныстық және репродуктивті денсаулық қауымдастығы» қоғамдық бірлестігінің (ҚМПА) Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссиямен бірлесіп, Chevron компаниясының қолдауымен жүзеге асырылуда.

Психолог Т. Макенованың жетекшілігімен өткен сабақтар барысында студенттер психологиялық, эмоционалдық және цифрлық шекара мәселелерін қарастырды. Қатысушылар өз сезімдерін тануды, «Мен-хабарламалары» арқылы өз ұстанымын білдіруді, жеке шекараларын сенімді түрде қорғауды және ақпараттандырылған келісім қағидаттарын сақтауды үйренді. Практикалық бөлімде рөлдік ойындар мен коммуникативтік дағдыларды дамытуға арналған жаттығулар өткізілді.

Бағдарлама ақпараттық және практикалық бөлімдерді қамтитын бес сабақтан тұрды. Тренинг студенттердің жеке шекараларға саналы көзқарасын, өзге адамдардың шекарасына құрметпен қарауын және конструктивті қарым-қатынас дағдыларын дамытуға ықпал етті. Университет атынан іс-шараны ұйымдастырушы Ж. Ромханқызы болды.