Esil University-де бухгалтерлік есепті автоматтандыру бойынша ғылыми-әдістемелік семинар өтті

Esil University-де «Есеп және аудит» және «Қаржы» білім беру бағдарламаларының студенттеріне арналған «1С: Бухгалтерия бағдарламасында қорлар есебін және контрагенттермен есеп айырысуды автоматтандыру» тақырыбында ғылыми-әдістемелік семинар өтті. Спикер ретінде «Artfood» ЖШС өкілі А. Байканова қатысты.

Іс-шараның мақсаты – студенттердің кәсіби құзыреттіліктерін арттыру және «1С: Бухгалтерия» бағдарламасымен жұмыс істеу бойынша практикалық дағдыларын дамыту. Қатысушылар тауарлық-материалдық қорлар есебін және контрагенттермен есеп айырысуды автоматтандырудың заманауи тәсілдерімен танысты.

Семинар барысында қорлардың кірісі мен шығысын рәсімдеу, жеткізушілермен және сатып алушылармен есеп айырысу, бастапқы бухгалтерлік құжаттарды қалыптастыру, берешекті бақылау және бухгалтерлік есептілікті дайындау мәселелері қарастырылды. Кәсіби қызметте цифрлық технологияларды практикалық қолдануға ерекше назар аударылды.

Семинарды экономика ғылымдарының магистрі, аға оқытушы А. Айтхожина ұйымдастырды. Іс-шара студенттердің теориялық білімдерін тереңдетуге, практикалық дағдыларын жетілдіруге және бухгалтерлік есепті автоматтандырудың заманауи құралдары туралы түсініктерін кеңейтуге мүмкіндік берді.