.png&w=1080&q=75)
2026 жылғы 3 қарашада Esil University-де «Әлеуметтік жұмыс» білім беру бағдарламасының апталығы аясында «Әлеуметтік жұмыстағы пәнаралық тәсіл: психолог, әлеуметтік қызметкер және медицина маманының өзара әрекеттестігі» тақырыбында шеберлік сабағы мен топтық жұмыс элементтері қамтылған әдістемелік семинар-практикум өтті. Іс-шараны «Әлеуметтік жұмыс және туризм» кафедрасының аға оқытушысы, әлеуметтік ғылымдар магистрі Гүлмира Жақупова профессор-оқытушылар құрамы мен «Әлеуметтік жұмыс» ББ 2-курс студенттеріне арнап өткізді.
Семинар барысында өмірлік қиын жағдайға тап болған адамдарға кешенді көмек көрсету кезінде әртүрлі сала мамандарының өзара әрекеттесу ерекшеліктері қарастырылды. Қатысушылар әлеуметтік қызметкердің, психологтың және медицина маманының кәсіби міндеттерін, командалық жұмыстың негізгі қағидаттарын, құпиялылықты сақтау, клиенттердің құқықтарын қорғау және әлеуметтік әрі медициналық қызметтерді үйлестіру мәселелерін талқылады.
Практикалық бөлімде жағдаяттық тапсырмаларды талдау, топтық жұмыстар және кәсіби жағдайларды модельдеу жүргізілді. Қатысушылар пәнаралық команда мамандарының міндеттерін айқындап, әлеуметтік сүйемелдеудің кешенді жоспарларын әзірледі. Сонымен қатар кейс-әдісті, рөлдік ойындарды және кәсіби консилиумды оқу үдерісінде қолдану мүмкіндіктері қарастырылды.
Іс-шара қорытындысы бойынша оқытушылар практикалық бағыттағы оқытуды жетілдіру жөнінде әдістемелік ұсыныстармен алмасты. Сондай-ақ болашақ әлеуметтік қызметкерлердің практикалық даярлығын арттыру мақсатында денсаулық сақтау және әлеуметтік қорғау ұйымдарының өкілдерімен бірлескен кездесулер ұйымдастырудың маңыздылығы атап өтілді.