Ақша-кредиттік реттеу бойынша платиналық дәріс өтті

«Қаржы» кафедрасының онкүндігі аясында экономика ғылымдарының докторы, профессор К. Шаяхметова Қазтұтынуодағы Қарағанды экономикалық университетінің «Қаржы» мамандығының екінші курс студенттеріне «Ақша-кредиттік реттеудің заманауи режимі» тақырыбында платиналық дәріс өткізді. Кездесу Zoom платформасында онлайн форматта ұйымдастырылды.

Дәріс барысында мемлекеттің ақша-кредит саясатының мәні, ақша айналымын реттеудің негізгі тетіктері және ақша-кредиттік реттеудің заманауи құралдары қарастырылды. Ұлттық валютаның тұрақтылығын қамтамасыз етудегі және қаржы жүйесінің орнықтылығын сақтаудағы орталық банктің рөліне ерекше назар аударылды.

Профессор сондай-ақ ақша-кредиттік реттеу әдістерінің дамуы, банк заңнамасындағы өзгерістер және олардың мемлекеттің экономикалық саясатына әсері туралы баяндады. Қатысушылар ақша-кредит саясатының тар және кең мағынадағы түсініктерімен, сондай-ақ оның ел экономикасының дамуындағы маңызымен танысты.

Дәріс соңында студенттер өздерін қызықтырған сұрақтарын қойып, дәріскермен пікір алмасты. Іс-шара студенттердің кәсіби білімдерін тереңдетуге және ақша-кредиттік реттеудің заманауи тетіктері туралы түсініктерін кеңейтуге ықпал етті.