И. Алтынсариннің этикалық көзқарастары тұрғысынан жоғары білім берудегі академиялық адалдық

Esil University-де «И. Алтынсариннің этикалық көзқарастары тұрғысынан жоғары білім берудегі академиялық адалдық» тақырыбында «Экономика» білім беру бағдарламасының 1-курс студенттерімен пікірталас өтті. Іс-шараны «Әлеуметтік-гуманитарлық пәндер» кафедрасының орыс тілі секциясының оқытушылары Э. А. Урунбасарова, Ф. З. Джаксылыкова, М. Х. Хасенова, А. А. Утегенова, С. Т. Ускенбаева және А. И. Кузнецова «Орыс тілі» пәні аясында ұйымдастырды.

Пікірталас барысында студенттер И. Алтынсарин шығармаларындағы адамгершілік құндылықтарды және олардың академиялық адалдық қағидаттарымен байланысын талқылады. «Бай баласы мен жарлы баласы», «Атымтай жомарт», «Әдеп» және «Ағаштар» әңгімелері негізінде өз бетінше еңбек етудің, зияткерлік меншікті құрметтеудің, академиялық ережелерді сақтаудың, плагиатқа жол бермеудің және білім алуға жауапкершілікпен қараудың маңыздылығы қарастырылды.

Іс-шара Esil University-де академиялық адалдық мәдениетін қалыптастыру бағытындағы жұмыстардың бір бөлігі болды. Талқылау қорытындысы бойынша студенттер академиялық адалдық тек белгіленген ережелерді сақтау ғана емес, сонымен қатар білім сапасына, болашақ маманның кәсіби абыройы мен беделіне әсер ететін саналы этикалық таңдау екенін атап өтті.